Tá an samhradh linn!

BHUEL, a chairde, tá súil agam go raibh samhradh iontach agaibh go dtí seo. Bhí tús an-mhaith agamsa don samhradh ag obair ag Campa Samhraidh Chonradh na Gaeilge Glaschú. Bhí an craic go hiontach ag an Champa, le níos mó ná 50 páiste ann thar na seactaine. Ar míle buíochas ag gabháil leis na páistí agus na teaghlaigh uilig a ghlac páirt ann.

Le ráth an Champa tá muid ag súil go mór anois lenár gCultúr Club do páistí a atosú i mí an Mheán Fómhair, i ndiaidh na laethanta saoire. Cosúil leis an Champa, ag an Chultúr Club bíonn seans ag páistí bunscoile an Ghaeilge a fhoghlaim agus a bheith ag foghlaim faoi cultúr agus oidhreacht na Éireann fríd ceol, amhráin, damhsa, cluichí, ealaín agus gníomhaí spóirtDéan teagmháil liom chun níos mó eolais a fháil agus ná caill an craic.

Táim ag scríobh seo agus mé sa Ghaeltacht in iardheisceart Dhún na nGall ag déanamh cúrsa Gaeilge ag Oideas Gael, coláiste na Gaeilge i nGleann Cholm Cille. Fiú gur Baile Átha Cliathach mé, is í seo an áit is ansa liom ar domhan.

Tá fuinneamh níos fearr fiú ná de ghnáth sa chontae faoi láthair agus gach duine ar bís i ndiaidh an bua a bhí ag foireann sinsear na bhfear i gcluiche leath-cheannais na hÉireann i gcoinne contae na Mí. Ciallaíonn sin go mbeidh siad sa chluiche cheannais ag deireadh na míosa. Beidh seans maith ag Dún na nGall agus Jim ‘Jimmy’s Winning Matches’ McGuinness ar ais mar bhainisteoir ach tá foireann láidir, mar is ghnáth, ag Ciarraí.

Táim ag súil go mór leis an chluiche, caithfidh mé a rá—mar duine neodrach, ba choir domh a rá, is dócha. Beidh mé ag amharc ar an chluiche i dteach tabhairne i nGlaschú le geansaí Átha Cliath orm sílim agus deirim i gcónaí gurbh fhearr liom amharc ar chluiche Dhún na nGall, agus geansaí Átha Cliath orm, i nDún na nGall ná i nGlaschú, mar bíonn an magadh níos measa i nGlaschú. Mar sin má fheiceann tú mé ar an 27ú, bigí deas, le do thoil agus bí deas do dhuine ar bith a d’fheicfeá i ngeansaí Ciarraí fosta—seachas más Corcaíoch thú! Ar scór ar bith, beidh an craic ar fheabhas, táim cinnte, cibe toradh a beidh ann.

Mar a dúirt mé i nGleann Cholm Cille faoi láthair agus táim ag teacht go dtí an ceantar seo—achan bliain seachas ceann amháin—le níos mó ná 15 bliain anuas. Is fíor sos é ó shaol na cathrach i nGlaschú a bheith san áit galánta, iargúlta, cois farraige seo—sos intinne agus sos d’anam, déarfainn féin.

Sin ráite níl an cúrsa atá mé ag déanamh furasta, caithfidh mé a rá. Cúrsa aistriúchán atá mé i mbun a dhéanamh i mbliana ach fiú go bhfuil sé deacair tá sé fíor-shuimiúil agus, mar is ghnáth, tá seans agam fosta bualadh le daoine fíor-shuimiúil atá ag déanamh cúrsaí anseo.

Duine ina measc siúd atá ag obair mar bhaill den chéad fhoireann aistriúchán—na Gaeilge—de chuid Feidhmeannas Thuaisceart Éireann. Sin post stairiúil ár ndóighe, daoine ag obair ar son na Gaeilge sa stát seirbhís sa Tuaisceart, agus is iontach an rud é a chloisteáil go bhfuil rudaí dearfacha, practiciúla ag teacht amach as an reachtaíocht a thug aitheantas oifigiúil don Ghaeilge ó Thuaidh don chéad uair ariamh. Mar a dúirt mé anseo roimhe, is rud amháin an reachtaíocht a thabhairt isteach ach is céim eile í a chur i bhfeidhm.

Muna raibh tú thart fán cheantar seo ariamh—agus tuigim go bhfuil nasc le tuaisceart na contae ag formhór de na hÉireanaigh i agus thart fá Glaschú—mholfainn go hard cuairt a thabhairt air.

Agus dá mbeadh suim ar bith agat sa Ghaeilge nó cultúr na hÉireann, mholfainn go hard fosta freastal ar chúrsa in Oideas Gael. Ní cursaí teanga amháin ar siúl acu anseo ach cúrsaí cheoil, seandálaíocht, amhránaíocht, timpeallacht agus dúlra, péinteoireacht agus go leor eile. Rud fá choinne gach duine, mar a deirtear, agus seans a bheith ar an trá gach lá fosta!

Níl gá duit áfach fanacht go dtí an samhradh seo chugainn chun do thuras leis an Ghaeilge a thosú mar bheidh seisiún Blas na Gaeilge agus seisiún amhránaíocht ar siúl Déardaoin, 7ú Lúnasa, thuas staighre i McNeills, mar chuid de Féile Idirnáisiúnta Govanhill. Agus ina dhiaidh sin, beidh ranganna Gaeilge ag tosú arís le Conradh na Gaeilge i Glaschú san Fómhair. Beidh na gníomhaíochtaí eile ag tosú arís fosta ag an am sin, na ciorcal comhráite, grúpa amhránaíocht agus eile.

Mar sin, seo an t-am chun do chéim féin dhéanamh ar aistear na Gaeilge—do chéad céim ariamh nó teacht ar ais chuici i ndiaidh tamaill. Ní bheidh aiféala ort faoi. Déan teagmháil lom agus beidh mé breá sásta an t-eolas uilig a thabhairt duit. Bígí linn!

Clár raidió nua i nGaeilge i nGlaschú anois: Cluas Oscailte ar Celtic Music Radio (www.celticmusicradio.net & 95FM), gach Dé Céadaoin, 6-7 in

cnag_glaschu@hotmail.com

www.cnag-glaschu.co.uk